സമസ്ത കേന്ദ്ര മുശാവറ അംഗവും പ്രഗത്ഭ പണ്ഡിതനും പ്രസിദ്ധ ഗ്രന്ഥകാരനുമാണ് ഖലമുൽ ഇസ്‌ലാം അബ്ദുറഹ്‌മാൻ മുസ്‌ലിയാർ എന്ന കോടമ്പുഴ ബാവ മുസ്‌ലിയാർ. 1946 ജൂലൈ 8ന് കോഴിക്കോട് ജില്ലയിലെ ബേപ്പൂരിലാണ് ജനനം. മാവൂർ ഖാളിയും മുദരിസുമായിരുന്ന കെ മുഹമ്മദ് മുസ്‌ലിയാരാണ് പിതാവ്. ഫറോക്ക് കോടമ്പുഴയിലാണ് താമസം.
വാഴക്കാട് ദാറുൽ ഉലൂം അറബിക് കോളേജിൽ നിന്ന് മുത്വവ്വൽ കോഴ്‌സും കേരള യൂണിവേഴ്‌സിറ്റിയിൽ നിന്ന് അഫ്‌ളലുൽ ഉലമയും പൂർത്തിയാക്കിയ ബാവ മുസ്‌ലിയാർ ബൗദ്ധിക മികവും ധൈഷണിക തികവുമുള്ള സമകാല പണ്ഡിത പ്രതിഭയാണ്. കേരള ഗവൺമെന്റ് അറബിക് ടെക്സ്റ്റ്ബുക്ക് കമ്മിറ്റി, സ്‌ക്രൂട്ടിനി കമ്മിറ്റി എന്നിവയിലെല്ലാം സേവനമനുഷ്ഠിച്ച ഉസ്താദ് ഇപ്പോൾ ദാറുൽ മആരിഫ് ഇസ്‌ലാമിക് സെന്റർ ജനറൽ സെക്രട്ടറിയായും കോടമ്പുഴ ദഅ്‌വാ കോളേജ് പ്രധാന മുദരിസായുമാണ് സേവനം ചെയ്യുന്നത്.
പ്രാഥമിക പഠനത്തിനു ശേഷം മാവൂർ ജുമുഅത്ത് പള്ളിയിലാണ് മതപഠനത്തിന് തുടക്കം കുറിക്കുന്നത്. പിതാവ് തന്നെയായിരുന്നു ഗുരു. ശേഷം രണ്ടുവർഷം കോടമ്പുഴ ജുമാമസ്ജിദിൽ പെരുമുഖം ബീരാൻ കോയ ഉസ്താദിന്റെയടുത്തും അഞ്ചുവർഷം വാഴക്കാട് ദാറുൽ ഉലൂമിൽ റഈസുൽ മുഹഖിഖീൻ കണ്ണിയത്ത് ഉസ്താദിന്റെയടുത്തും പഠനം നടത്തി. പിന്നീടങ്ങോട്ട് അധ്യാപനത്തിലും ഗ്രന്ഥപാരായണത്തിലും രചനയിലുമായി ജീവിത യാത്ര തുടർന്നു. കോടമ്പുഴ ജുമാമസ്ജിദിൽ സഹമുദരിസായും പത്തുവർഷക്കാലം രാമനാട്ടുകര ടൗൺ മസ്ജിദ് ഖത്വീബായും സേവനം ചെയ്തിട്ടുണ്ട്.
രചനാ ലോകത്തേക്ക്
12 വിജ്ഞാന ശാഖകൾ, 120 ഗ്രന്ഥങ്ങൾ, 26,200 പേജുകൾ. ഇതാണ് ഇപ്പോൾ ഖലമുൽ ഇസ്‌ലാമിന്റെ രചനാ ലോകത്തിന്റെ രത്‌നച്ചുരുക്കം. അനുഗൃഹീത തൂലിക എന്ന പ്രയോഗത്തെ അക്ഷരാർത്ഥത്തിൽ അന്വർത്ഥമാക്കുന്ന വിധമാണ് ശൈഖുനയുടെ രചനാ മേൽവിലാസം. ലോകത്തിലെ ഏറ്റവും വലിയ പുസ്തക പ്രദർശനങ്ങളിലൊന്നായ ഷാർജ ഇന്റർനാഷണൽ ബുക്‌ഫെയറിൽ ഒരു ഗ്രന്ഥകാരന്റെ നൂറിലധികം പുസ്തകങ്ങളുള്ള ഏക സ്റ്റാൾ ശൈഖുനയുടേത് മാത്രമാണെന്നതു ശ്രദ്ധേയമാണ്.
ഉസ്താദുമാരുടെ ഇജാസത്തും മഹാത്മാക്കളുടെ അനുഗ്രഹാശിസ്സുകളുമാണ് രചനാ മുന്നേറ്റത്തിന്റെ കരുത്ത്. താജുൽ ഉലമ ഉള്ളാൾ തങ്ങളുടെ ജീവിത കാലത്ത് കരുവൻതിരുത്തിയിലെ വീട്ടിൽ ചെന്ന് പല കിതാബുകളും തുടങ്ങുമ്പോൾ ‘ബിസ്മി’ എഴുതി വാങ്ങിയിരുന്നത് ഓർക്കുന്നു. കുറെ ഗ്രന്ഥങ്ങൾ എഴുതി പ്രസിദ്ധീകരിക്കുക എന്നതിലപ്പുറം ആത്മീയ പശ്ചാത്തലമുള്ള തൂലികാ സേവനമാണ് ഉസ്താദിന്റേത്. സയ്യിദുൽ ബശർ എന്ന ഗ്രന്ഥം മദീനയിലെ മസ്ജിദുന്നബവിയിൽ റൗളാശരീഫിൽ വെച്ച് ആദ്യാന്തം പാരായണം നടത്തി തിരുസവിധത്തിൽ സമർപണം ചെയ്ത ശേഷമാണ് പ്രസിദ്ധീകരിച്ചത്. പ്രസിദ്ധീകരിച്ച ശേഷവും അവിടെ വെച്ചു പുന:സമർപണം നടന്നു. അൽ ഇമാമുശ്ശാഫിഈ(റ); മനാഖിബുഹു വ മവാഹിബുഹു എന്ന ഗ്രന്ഥം ഈജിപ്തിലെ ഇമാം ശാഫിഈ(റ)യുടെ സന്നിധാനത്തിൽ വെച്ചാണ് പ്രകാശനം നടന്നത്. ‘ഖുത്വുബുൽ അഖ്ത്വാബ് അശ്ശൈഖ് അബ്ദുൽ ഖാദിർ ജീലാനി(റ)’ എന്ന ഗ്രന്ഥം ബഗ്ദാദിലെ ശൈഖിന്റെ ദർഗയിൽ വെച്ചും ‘ഇമാമുൽ മുഹദ്ദിസീൻ മുഹമ്മദ് ബ്‌നു ഇസ്മാഈലുൽ ബുഖാരി(റ)’ എന്ന ഗ്രന്ഥം ഉസ്ബക്കിസ്ഥാനിലെ ബുഖാറയിലുള്ള ഇമാമിന്റെ സവിധത്തിൽ വെച്ചുമാണ് പ്രകാശനം ചെയ്തത്. ‘അൽ അംസിലതുർറാഇഅ മിനൽ മുഅ്ജിസാതി സ്സാത്വിഅ’ എന്ന തിരുനബി(സ്വ)യുടെ അമാനുഷികതകൾ സവിസ്തരം പ്രതിപാദിക്കുന്ന ഗ്രന്ഥം മദീന ഹറമിൽ വെച്ച് പ്രകാശിതമായ മറ്റൊരു രചനയാണ്. ഇങ്ങനെ അദബും ഗുരുത്വവും സൂക്ഷിക്കുന്നതാണ് ഉസ്താദിന്റെ രചനാ ജീവിതം.
ആദ്യകാല രചനകൾ
വാമൊഴികളെക്കാൾ വരമൊഴികൾക്കാണ് കൂടുതൽ വീര്യമുള്ളതെന്നും ഗതകാല തലമുറയിൽ പ്രഗത്ഭരായ നിരവധി പണ്ഡിതരുണ്ടായിട്ടും രചനകളില്ലാത്തതുകൊണ്ടാണ് പിൽകാലത്ത് പലരും ജനമനസ്സുകളിലിടം പിടിക്കാതിരുന്നതെന്നും ചിന്തിച്ചപ്പോഴാണ് സമീപ-വിദൂര ദിക്കുകളിലുള്ളവർക്കും പിൻതലമുറക്കും ഉപകരിക്കണമെന്ന തീരുമാനത്തോടെ ഖലമുൽ ഇസ്‌ലാം ഗ്രന്ഥമെഴുത്തിലേക്ക് കടക്കുന്നത്. ലോകഗുരു, നീ എങ്ങോട്ട്, ദാമ്പത്യ വിജ്ഞാന സംഗ്രഹം, മഖ്ബറയിലെ ആചാരങ്ങൾ; തെറ്റും ശരിയും തുടങ്ങിയ കൊച്ചുകൃതികൾ പഠന കാലത്ത് എഴുതിയിരുന്നു. അന്ത്യപ്രവാചകരുടെ പ്രവചനങ്ങൾ എന്ന 1978ൽ പ്രസിദ്ധീകൃതമായ കൃതിയാണ് ഉസ്താദിന്റെ ആദ്യകാലത്തെ പ്രധാന ഗ്രന്ഥം.
പാഠപുസ്തകങ്ങൾ
പാഠപുസ്തക രചനയിലൂടെയാണ് കോടമ്പുഴ ഉസ്താദ് ജനശ്രദ്ധ നേടുന്നത്. ഓരോ ക്ലാസിലെയും വിദ്യാർത്ഥികളുടെ ബൗദ്ധിക നിലവാരത്തിനനുസരിച്ചുള്ളതും പുതുമയേറിയതും കെട്ടിലും മട്ടിലും മികവുറ്റതുമായിരുന്നു അവ. വടക്കേക്കാട് ഐസിഎ കോളേജ് മാനേജ്‌മെന്റ് ആവശ്യപ്പെട്ടതനുസരിച്ച് രചിച്ച അൽഖിറാഅതുൽ ഇസ്‌ലാമിയ്യയാണ് പ്രഥമ പാഠപുസ്തകം. ഒന്ന് മുതൽ അഞ്ച് വരെ ക്ലാസുകളിലേക്കുള്ള മലയാള പുസ്തകങ്ങൾ പിഎംകെ ഫൈസിയും ആറ് മുതൽ പത്താം തരം വരെയുള്ളവ ബാവ ഉസ്താദുമാണ് തയ്യാറാക്കിയത്. അക്കാലത്ത് അവിടെ ഇസ്‌ലാമിക് വിഭാഗം മേധാവിയായി സേവനം ചെയ്യുകയായിരുന്നു പിഎംകെ. പദ്യ ഗദ്യ സമ്മിശ്രമായ അറബി റീഡറുകളായിരുന്നു അവ. 1988ലെ ഈ രചനക്കു ശേഷമാണ് സമസ്ത കേരള സുന്നി വിദ്യാഭ്യാസ ബോർഡിന്റെ പാഠപുസ്തകങ്ങൾ രചിക്കുന്നത്. പഴയകാല ഇമാമുമാരുടെ രചനാ ശൈലിയും പുതുമയുടെ സൗന്ദര്യവും ഇഴുകിച്ചേർന്ന രീതിയിലായിരുന്നു അവ തയ്യാറാക്കിയത്.
രചനാ ശൈലി
ഏറ്റവും ആധികാരികവും സമ്പൂർണവുമായിരിക്കും ഖലമുൽ ഇസ്‌ലാമിന്റെ ഓരോ കൃതിയും. ഓരോ ലേഖനവും ഓരോ പഠന പ്രബന്ധവുമായിരിക്കും. ഉദാഹരണമായി ഈയിടെ പ്രസിദ്ധീകൃതമായ ‘ദയാവധം’ എന്ന കൃതി തന്നെയെടുക്കാം. വൈദ്യശാസ്ത്ര-മത വിശകലനമുള്ള കൃതിയായതിനാൽ അവതാരികയിൽ പോലും പ്രസ്തുത സമന്വയം കാണാവുന്നതാണ്. ബദ്‌റുസ്സാദാത്ത് സയ്യിദ് ഇബ്‌റാഹീം ഖലീലുൽ ബുഖാരിയും ഡോ. മുഹമ്മദ് ഹനീഫയുമാണ് അവതാരികയെഴുതിയത്. ഡോ. ഹനീഫ എഴുതുന്നത് കാണുക: ‘ആരോഗ്യ മേഖലയിൽ പ്രവർത്തിക്കുന്ന ഞങ്ങളെപ്പോലുള്ളവർക്ക് പലപ്പോഴും രോഗികളുമായി ബന്ധപ്പെട്ട് ഇത്തരം പ്രശ്‌നങ്ങളിൽ ഇടപെടാനും വേണ്ട ഉപദേശ നിർദേശങ്ങൾ നൽകുവാനും പ്രസ്തുത രചന സഹായമാണെന്നതിൽ അശേഷം തർക്കമില്ല’ (പേ. 10).
പുസ്തകത്തിലെ പഠനക്രമവും ആകർഷകമാണ്. ദയാവധത്തിന്റെ നിർവചനത്തിൽ തുടങ്ങി ആരോഗ്യ സംരക്ഷണം, ആരോഗ്യ ചൂഷണം, ആതുര സാന്ത്വനം, മാനസിക സാന്ത്വനം തുടങ്ങി ദയാവധമില്ലാതിരിക്കാൻ വേണ്ട കാര്യങ്ങൾ തുടങ്ങിയവ ആമുഖത്തിലുണ്ട്. ശേഷം മൃഗവധത്തിന്റെ വിവിധ വശങ്ങൾ ചർച്ച ചെയ്യുന്നു. അതിനു ശേഷം ആത്മഹത്യ, നരഹത്യ എന്നിവ സംബന്ധിച്ച വിശകലനമാണ്. പിന്നീട് മനുഷ്യരിലെ ദയാവധ ചർച്ചയാണ്. ദയാവധം എന്ന പദത്തിന്റെ ഉത്ഭവവും മലയാളത്തിൽ അതാദ്യമായി ഉപയോഗിച്ചതാരെന്നും വ്യക്തമാക്കുന്നു. ‘ഹിറ്റ്‌ലറും അനുയായികളും ഈ പുസ്തകത്തിനു ‘യൂതനേസ്യ’ അഥവാ ദയാവധം എന്ന പേരാണ് നൽകിയത്. യൂതനേസ്യ (ഋൗവേമിമശെമ) എന്ന ഗ്രീക്ക് പദത്തിന്റെ അർത്ഥം നല്ല മരണം എന്നാണ്. മലയാളത്തിൽ സുകുമാർ അഴീക്കോടാണ് ആദ്യമായി ദയാവധം എന്ന വാക്ക് ഉപയോഗിച്ചത് (മലയാള മനോരമ 2018 മാർച്ച് 10). (ദയാവധം പേ. 45).
ശേഷം ദയാവധത്തിന്റെ വിവിധയിനങ്ങൾ, ദയാവധം ലോകരാഷ്ട്രങ്ങളിൽ, ദയാവധം ഇന്ത്യയിൽ, ദയാവധം ഇസ്‌ലാമിക വീക്ഷണത്തിൽ, ലോക പണ്ഡിത സഭകളുടെ ഫത്‌വകൾ, ദയാവധം അനുവദിക്കുന്നതിന്റെ ദൂഷ്യഫലങ്ങൾ എന്നിവയെല്ലാം വിശദീകരിച്ചാണ് കൃതി അവസാനിക്കുന്നത്. ഉസ്താദിന്റെ ഒരു പുസ്തകം ആദ്യാന്തം വായിക്കുമ്പോൾ തദ്വിഷയകമായി സമ്പൂർണ പഠനം ലഭിച്ചതായി ഓരോ വായനക്കാരനും അനുഭവപ്പെടും.
ഉസ്താദിന്റെ അറബി ഗ്രന്ഥങ്ങളും വേറിട്ട രചനാരീതിയിലുള്ളതാണ്. ചരിത്രഗ്രന്ഥമെഴുത്തിൽ ആർക്കും പെട്ടെന്ന് ഗ്രാഹ്യമാകുന്ന ശൈലിയിലാണ് അദ്ദേഹം സ്വീകരിക്കാറുള്ളത്. ഉസ്താദിന്റെ മാസ്റ്റർപീസെന്ന് വിശേഷിപ്പിക്കാവുന്ന സയ്യിദുൽ ബശർ തന്നെ നോക്കാം. ബൃഹത്തായ ചരിത്ര ഗന്ഥങ്ങളിൽ വിശദമായി പ്രതിപാദിച്ച സംഭവങ്ങൾ സംക്ഷിപ്തമായും അതിലെ നെല്ലും പതിരും വേർതിരിച്ചും ഏറ്റവും ആധികാരികമായതു മാത്രം ചേർത്തുമാണ് ഇതദ്ദേഹം രചിച്ചത്. ഓരോ സംഭവവും തലവാചകം നൽകിയും ഉപവിഷയങ്ങൾ പ്രത്യേകം പരാമർശിച്ചും പരിചയപ്പെടുത്തുന്നു. അനിവാര്യ സ്ഥലങ്ങളിൽ പ്രദേശങ്ങളുടെ മാപ്പും നൽകിയിട്ടുണ്ട്. ചരിത്ര സംഭവങ്ങളുടെ കാലഗണന ചാർട്ടായും ആവശ്യമായവയുടെ വിശദീകരണം അടിക്കുറിപ്പായും പദവിശകലനവും പ്രത്യേകം ചേർത്തിട്ടുണ്ട്. തിരുനബി(സ്വ)യുടെ ജീവചരിതത്തിൽ മുസ്‌ലിം വിരുദ്ധ പ്രചാരകരുടെ ദുർവാദങ്ങളുടെ മുനയൊടിക്കുകയും പാശ്ചാത്യരുടെ നബിവിമർശനത്തിന്റെ അന്തസ്സാര ശൂന്യത തുറന്നുകാണിക്കുകയും ചെയ്യുന്നുണ്ട്. കിതാബിന്റെ അവസാന ഭാഗത്ത് ഗ്രന്ഥത്തിൽ പരാമർശിച്ച നാടുകളും സ്ഥലങ്ങളും അക്ഷരമാലാ ക്രമത്തിൽ കൊടുത്തത് റഫറൻസിന് സഹായകമാണ്.
പുതിയതും പഴയതുമായ കൃതികൾ അവലംബിച്ചാണ് സയ്യിദുൽ ബശർ രചിച്ചിട്ടുള്ളത്. ഉസ്താദ് തന്നെ പറയുന്നു: ‘സയ്യിദുൽ ബശർ ഗ്രന്ഥരചനക്ക് പ്രധാനമായും പ്രാചീനരായ ആധികാരിക പണ്ഡിതന്മാരുടെ ഗ്രന്ഥങ്ങളാണ് അവലംബിച്ചത്. ഇമാം ത്വബരി(റ)യുടെ താരീഖുൽ ഇമമി വൽ മൂലൂക്, ഇബ്‌നു ഹിശാമിന്റെ സീറതുന്നബി, ഇബ്‌നുൽ അസീസിന്റെ അൽകാമിൽ, ഇബ്‌നു കസീറിന്റെ അൽബിദായത്തു വന്നിഹായ, ഇമാം ഹലബിയുടെ ഇൻസാനുൽ ഉലൂൻ, ഖസ്ത്വല്ലാനിയുടെ അൽമവാഹിബുല്ലദിന്നിയ്യ, സംഹൂരിയുടെ വഫാഉൽ വഫാ ആദിയായ ഗ്രന്ഥങ്ങളാണ് പ്രധാനമായും അവലംബമാക്കിയത്. പുതിയ രീതി മനസ്സിലാക്കാൻ പുതിയ രചയിതാക്കളുടെ കൃതികളും വായിച്ചിട്ടുണ്ട്.’
ഗ്രന്ഥങ്ങളുടെ വിസ്മയ ലോകം
വൈവിധ്യമാർന്ന വിഷയങ്ങളിൽ ആധികാരിക അവലംബങ്ങളോടെ കനപ്പെട്ട നിരവധി ഗ്രന്ഥങ്ങൾ കോടമ്പുഴ ബാവ മുസ്‌ലിയാർ രചിച്ചിട്ടുണ്ട്. ഉസ്താദിന്റെ എഴുത്തിന്റെ ഒഴുക്കും തൂലികാ വേഗവും അത്ഭുതകരമാണ്. തൊണ്ണൂറ്റിയൊമ്പതാമത്തെ ഗ്രന്ഥരചന നടക്കുമ്പോഴാണ് ശിഷ്യഗണങ്ങളും കോടമ്പുഴ നിവാസികളും പ്രാസ്ഥാനിക നേതൃത്വവും സ്ഥാപന സഹകാരികളും ചേർന്ന് നൂറാം ഗ്രന്ഥ പ്രകാശന സമ്മേളനം സംഘടിപ്പിക്കാൻ തീരുമാനിച്ചത്. പ്രകാശന സമ്മേളനം, അൽഖലം കോൺഫറൻസ് തുടങ്ങി വിപുലമായ പദ്ധതികളൊരുക്കി പ്രവർത്തകർ മുന്നോട്ടു പോവുകയും 2019 ഡിസംബറിൽ സമ്മേളനം നടക്കുകയും ചെയ്തു. ‘അൽ ഇസ്‌ലാം’ എന്ന അറബി ഗ്രന്ഥമായിരുന്നു പ്രകാശനത്തിന് തിരഞ്ഞെടുത്ത നൂറാം രചനയെങ്കിലും സമ്മേളന സമയമാകുമ്പോഴേക്കും ഇതിനു പുറമെ മൂന്ന് കിതാബുകൾ കൂടി ഉസ്താദ് പൂർത്തിയാക്കിയിരുന്നു.
പ്രോസ്റ്റേറ്റ് ഗ്രന്ഥി വീക്കവുമായി ബന്ധപ്പെട്ട് ഒരു മേജർ സർജറി കഴിഞ്ഞ് വീട്ടിൽ പൂർണ വിശ്രമത്തിലായിരുന്ന ഉസ്താദ് പിന്നീട് സ്ഥാപനത്തിലേക്ക് വരുന്നത് ‘ശർഹു മൻളൂമതി ഇബ്‌നിൽ ഇമാദ്’ എന്നൊരു രചനയുമായാണ്. രോഗങ്ങളുടെ പിടിയിലമർന്ന് ഹോസ്പിറ്റലിലും വീട്ടിലുമായി കഴിച്ചുകൂട്ടിയ സമയത്തും എഴുത്തിൽ അതീവ ജാഗ്രത കാണിച്ചു. കിതാബുൽ ഉജാബ്, മഅൽ കുതുബ്, സഖാഫതുർറഈസ് എന്നീ കിതാബുകളും ദയാവധം എന്ന മലയാള പുസ്തകവും ഇക്കാലയളവിൽ പ്രകാശിതമായതാണ്. താനെഴുതിയ ഗ്രന്ഥങ്ങളുടെ റോയൽറ്റി സ്വീകരിച്ചാൽ തന്നെ വൻതുക സമ്പാദിക്കാമായിട്ടും കൃതികളൊക്കെയും അല്ലാഹുവിന്റെ പ്രീതി മാത്രം പ്രതീക്ഷിച്ച് പ്രസിദ്ധീകരിക്കുകയും ആ ഇനത്തിൽ ഒരു രൂപ പോലും വ്യക്തിപരമായി സമ്പാദിക്കാതിരിക്കുകയും മുഴുവൻ തുകയും സ്ഥാപനത്തിന് വേണ്ടി ചെലവഴിക്കുകയും ആ സ്ഥാപനത്തിൽ ശമ്പളം പറ്റാതെ സൗജന്യസേവനം നടത്തുകയും ചെയ്യുമ്പോൾ ഇതുപോലുള്ള അനിതര സാധാരണമായ സൗഭാഗ്യങ്ങൾക്ക് അർഹനാകുന്നതിൽ അത്ഭുതമില്ല.
തഫ്‌സീർ
മുപ്പതോളം സുപ്രധാന ഗ്രന്ഥങ്ങൾ അവലംബിച്ച് രചിക്കുകയും അവതരണ പാശ്ചാത്തലവും പ്രാധാന്യവും വിശദീകരിക്കുന്നതോടൊപ്പം സാന്ദർഭിക വിഷയങ്ങൾ ചർച്ച ചെയ്യുകയും കഥാസ്പർശിയായ ആയത്തുകളുടെ അവസാനം സൂചിത കഥകളുടെ സംക്ഷേപം നൽകുകയും ചെയ്യുന്ന 30 വാള്യങ്ങളുള്ള (20 വാള്യങ്ങൾ ഇപ്പോൾ പുറത്തിറങ്ങി) തൈസീറുൽ ജലാലൈനി, ഖുർആൻ വ്യാഖ്യാനങ്ങളിൽ അതിവിശിഷ്ഠമായ ഇമാം ബൈളാവി(റ)ന്റെ അൻവാറുത്തൻസീൽ വ അസ്‌റാറുത്തഅ്‌വീൽ എന്ന തഫ്‌സീർ ഗ്രന്ഥത്തിന് തയ്യാറാക്കിയ ‘തസ്ഹീലുൽ ബൈളാവി’ തുടങ്ങിയവ തഫ്‌സീറിലുള്ള പ്രസിദ്ധ ഗ്രന്ഥങ്ങളാണ്.
ഹദീസ്
പ്രവാചക വചനങ്ങളുടെ അന്തസ്സാരങ്ങളിലേക്കൊരു പഠനയാത്ര നടത്തുന്ന മൊഴിയും പൊരുളും, പുണ്യഭൂമിയിലേക്കു തിരിക്കുന്ന ഹാജിമാരുടെ ദൗത്യവും തീർത്ഥാടക മനസ്സിന്റെ പുണ്യവും അവരുടെ ഹൃദയ വികാരങ്ങളും ഹജ്ജ് മബ്‌റൂറിന്റെ അനിവാര്യ ഗുണങ്ങളും ഹദീസിന്റെ വെളിച്ചത്തിൽ വിശദീകരിക്കുന്ന ‘ഹജ്ജ് മബ്‌റൂർ’, സദ്ഗുണങ്ങൾ തന്നിലുണ്ടോ എന്നും ദുർഗുണങ്ങൾ ബാധിച്ചിട്ടുണ്ടോയെന്നും പ്രവാചക വചനങ്ങളുടെ വെളിച്ചത്തിൽ ആത്മപരിശോധന നടത്താൻ സഹായിക്കുന്ന ‘ഇബ്തുബാറുന്നഫ്‌സ് ഫീ മൗഇൽ അഹാദീസിന്നബവിയ്യ’ തുടങ്ങിയവ ഈ വിജ്ഞാന ശാഖയിലെ പ്രധാന കൃതികളാണ്.
ഫിഖ്ഹ്
പ്രാമാണിക ഗ്രന്ഥങ്ങളെ ആധാരമാക്കി പ്രബല വിധികൾ മാത്രം അതിലളിതമായി അവതരിപ്പിക്കുന്ന കർമശാസ്ത്ര സംക്ഷേപമായ ‘ഖുലാസതുൽ ഫിഖ്ഹിൽ ഇസ്‌ലാമി’, ഇൻഷൂറൻസ് വകഭേദങ്ങളും അതുമായി ബന്ധപ്പെട്ട നിഷിദ്ധ സാമ്പത്തിക ഇടപാടുകളും കർമശാസ്ത്ര പിൻബലത്തോടെ വിശദീകരിക്കുന്ന ‘അത്തഅ്മീൻ ഫീ മിൻളാരിൽ ഫിഖ്ഹിൽ ഇസ്‌ലാമി’ എന്നിവ കർമശാസ്ത്രത്തിലെ പ്രസിദ്ധ അറബി ഗ്രന്ഥങ്ങളാണ്.
ജനിതക ശാസ്ത്രത്തിന്റെ ഇന്ദ്രജാലം എന്ന ഗ്രന്ഥം ക്ലോണിംഗ്, സയാമീസ് ഇരട്ടകൾ, ടെസ്റ്റ് ട്യൂബ് ശിശു, രക്തദാനം, അവയവദാനം, ലിംഗമാറ്റം, പ്ലാസ്റ്റിക് സർജറി തുടങ്ങിയ ആധുനിക സമസ്യകളുയർത്തുന്ന ധാർമിക നൈതിക പ്രശ്‌നങ്ങൾക്ക് വിശുദ്ധ ഇസ്‌ലാം നിർദേശിക്കുന്ന സുവ്യക്തവും ലളിതവുമായ പരിഹാരമാർഗങ്ങളിലേക്ക് ശ്രദ്ധതിരിക്കുന്ന കൃതിയാണ്. രോഗശയ്യയിൽ, ഓപ്പറേഷൻ തിയേറ്ററിൽ, തടവറയിൽ, യാത്രയിൽ, പ്രവാഹത്തിൽ എങ്ങനെ മുറതെറ്റാതെ നിസ്‌കരിക്കും? കാറിലും ബസിലും ട്രെയ്‌നിലും പ്ലെയ്‌നിലും കപ്പലിലും നിസ്‌കാരം എങ്ങനെ നിർവഹിക്കും? ധ്രുവ പ്രദേശം, ആകാശം, ബഹിരാകാശം എന്നിവിടങ്ങളിലെ നിസ്‌കാരക്രമം എങ്ങനെ? ഇത്യാദി പ്രശ്‌നങ്ങൾക്ക് കർമശാസ്ത്ര ഉദ്ധരണങ്ങളോടെ മറുപടി നൽകുന്നതാണ് ‘നിസ്‌കാരം വിഷമഘട്ടങ്ങളിൽ’ എന്ന കൃതി.
തഖ്‌ലീദ് സംബന്ധമായ പ്രശ്‌നങ്ങൾക്ക് ഏറ്റവും ലളിതമായ മറുപടി നൽകുന്നതും സാധാരണക്കാർക്കും വിദ്യാർത്ഥികൾക്കും ഉപകാരപ്രദവുമായ തഖ്‌ലീദ്; സംശയങ്ങൾക്ക് മറുപടി, കുട്ടികളുടെ പിറവി തൊട്ട് സ്വർഗപ്രവേശം വരെയുള്ള കാര്യങ്ങൾ പ്രതിപാദിക്കുന്ന നൂറിലധികം ഗ്രന്ഥങ്ങൾ അവലംബിച്ച് 400 പേജിൽ തയ്യാർ ചെയ്ത ആലമുൽ ഔലാദ്, വിശുദ്ധ ഖുർആൻ വന്ദന വിധികൾ, നിന്ദന വിലക്കുകൾ, വഹന നിയമങ്ങൾ, സ്പർശന നിയമങ്ങൾ, സമീപന രീതികൾ തുടങ്ങി ഖുർആനുമായി ബന്ധപ്പെട്ട നിരവധി ചർച്ചകൾ ചോദ്യേത്തര രൂപത്തിൽ അവതരിപ്പിക്കുന്ന ഖുർആൻ, വഹന സ്പർശന നിയമങ്ങൾ, ജമാഅത്തിന്റെ പ്രാധാന്യം, നിയമങ്ങൾ, ഉപാധികൾ, സംഘാടനത്തിലെ തെറ്റും ശരിയും തുടങ്ങിയവ പ്രതിപാദിക്കുന്ന ജമാഅത്ത് നിസ്‌കാരം: സംശയ നിവാരണം, ഉള്ഹിയ്യത്ത്-അഖീഖത്ത് സംബന്ധമായ അനിവാര്യ നിയമങ്ങൾ സാധാരണക്കാർക്കു സുഗ്രാഹ്യമാവും വിധം സരളമായി അവതരിപ്പിക്കുന്ന ‘ഉള്ഹിയ്യത്ത് നിയമങ്ങൾ ചോദ്യോത്തരം’ എന്നിവയെല്ലാം ഏറെ ഉപകാരപ്രദമായ കൃതികളത്രെ.
‘പ്രശ്‌നങ്ങൾ, പ്രതിവിധികൾ’ ശ്രദ്ധേയമായ 201 ചോദ്യങ്ങൾക്ക് ആധികാരിക ഗ്രന്ഥോദ്ധരണങ്ങൾ സഹിതം പഠനാർഹങ്ങളായ മറുപടികൾ കണ്ടെത്തുന്ന കൃതിയാണ്. ത്വലാഖിന്റെ പ്രസക്തി, ഇനങ്ങൾ, രീതികൾ, ത്വലാഖു സംഭവങ്ങൾ, നിയമാനുസൃത ത്വലാഖുകൾ, നിയമവിരുദ്ധ മോചനങ്ങൾ, മുത്വലാഖ് ചർച്ചകൾ ആധികാരികോദ്ധരണങ്ങൾ സഹിതം വിവരിക്കുന്ന ‘ത്വലാഖ് ഫത്‌വകൾ’, ശ്രദ്ധേയ ചോദ്യങ്ങൾ, അനിവാര്യ പ്രശ്‌നങ്ങൾ, ആധികാരിക മറുപടികൾ, സുപ്രധാന മസ്അലകൾ അവസരോചിത പ്രതിവിധികൾ എന്നിവയടങ്ങുന്ന ‘ശ്രദ്ധേയ ഫത്‌വകൾ’ എന്നിവ ഏതൊരാൾക്കും ഒറ്റവായനയിൽ ഗ്രഹിക്കാവുന്ന വിധം തയ്യാർ ചെയ്തവയാണ്. ‘ശർഹു മൻളൂമതി ഇബ്‌നിൽ ഇമാദ്, ‘അത്യുത്തമ കർമങ്ങൾ, ഹജ്, ഉംറ സിയാറത്ത്, നെറ്റ്‌വർക്ക് ബിസിനസ്, ഇസ്‌ലാമിക വീക്ഷണത്തിൽ തുടങ്ങിയവ കർമശാസ്ത്ര രചനകളാണ്.
തസ്വവ്വുഫ്
തത്ത്വോപദേശ സമാഹാരമായ അൽഹികം എന്ന ഗ്രന്ഥത്തിൽ നിന്ന് ശൈഖ് ഇബ്‌നു അബ്ബാദ്, ശൈഖുൽ ഇസ്‌ലാം അബ്ദുല്ലാഹിശ്ശർഖാമി എന്നിവരുടെ വ്യാഖ്യാനങ്ങളെ അവലംബമാക്കി തയ്യാർ ചെയ്ത വിവർത്തന ഗ്രന്ഥമായ ‘ആത്മജ്ഞാനികളുടെ പറുദീസ’ ആത്മീയലോകത്തേക്കു വഴികാട്ടിയായ അദ്കിയായുടെ ലളിതസുന്ദരമായ തർജ്ജമയായ ‘ആത്മീയോൽക്കർഷത്തിന്റെ വിഹായസ്സിലേക്കക്ക്’ എന്നിവ തസ്വവ്വുഫിലെ ശ്രദ്ധേയ ഗ്രന്ഥങ്ങളാണ്. ‘ഇഹ്ദാഉസ്സ്വലവാത്തിസ്സാഹിറ അലന്നബിയ്യി(സ്വ) ബിൽ മുഅ്ജിസാത്തിൽ ബാഹിറ’ സ്വലാത്ത് സമാഹാരമാണ്. 140 സ്വലാത്തുകളിലും തിരുനബി(സ്വ)യുടെ ഓരോ മുഅ്ജിസത്ത് പരിചയപ്പെടുത്തുന്നു. ദിക്ർ എന്ത്? എന്തിന്? എങ്ങനെ? എത്ര? എപ്പോൾ? ദിക്ർ: വാചനം, മനനം, ഹൽഖകൾ, ദഫ്മുട്ട്, കുത്ത്‌റാത്തീബ്, ആട്ടം, ചാട്ടം, തസ്ബീഹ് മാല, ഖത്മുൽ ഖുർആൻ, സ്വലാത്ത്: വിധി, യുക്തി, മഹത്ത്വം, പദങ്ങൾ ഫലങ്ങൾ, സ്വലാത്തുന്നാരിയ, സ്വാലാത്തുൽ മുൻജിയ ആദിയായ വിഷയങ്ങളുടെ ലളിത വിശദീകരണമാണ് ‘ഫിർദൗസുൽ അദ്കാർ.’ മാതാവിന്റെ മഹിമ, പിതാവിന്റെ മേന്മ, മാതാപിതാക്കളോടുള്ള കടമകൾ, അവരോടു കാണിക്കേണ്ട മര്യാദകൾ, അവരുടെ തൃപ്തി സമ്പാദിച്ചാലുണ്ടാകുന്ന ഭൗതികവും പാരത്രികവുമായ നേട്ടങ്ങൾ ഇത്യാദി കാര്യങ്ങൾ വിശുദ്ധ ഖുർആനിന്റെയും തിരുസുന്നത്തിന്റെയും അടിസ്ഥാനത്തിൽ വിശദീകരിക്കുന്ന കൊച്ചുകൃതിയാണ് ‘ഔസതു അബ്‌വാബിൽ ജന്ന.’ ജൗഹറതുത്തൗഹീദ്, ഹിദായതുൽ അദ്കിയ, നഫാഇസുദ്ദുറർ എന്നിവയുടെ വ്യാഖ്യാനമാണ് ‘രിസ്ഖുൽ അസ്വ്ഫിയാഅ്.
‘വിശ്വസശാസ്ത്രം
അല്ലാഹുവിന്റെ തിരുനാമങ്ങൾക്ക് ഇമാം ഗസാലി(റ) തൊട്ട് യൂസുഫുന്നബ്ഹാനി(റ) വരെയുള്ള പ്രഗത്ഭ പണ്ഡിതർ രചിച്ച ബൃഹത്തായ ആധികാരിക വ്യാഖ്യാനങ്ങളെ ആധാരമാക്കി ഉസ്താദ് എഴുതിയ സംക്ഷിപ്ത ഗ്രന്ഥമായ ‘യനാബിഉൽ ഗിനാ ശർഹു അസ്മാഇല്ലാഹിൽ ഹുസ്‌നാ’, അല്ലാഹുവിന്റെ നാമങ്ങളെ ഇതിവൃത്തമാക്കി ഖുത്വുബുൽ അഖ്ത്വാബ് അബ്ദുൽ ഖാദിർ(റ)വും അൽഅല്ലാമ മുഹമ്മദ് ദിംയാത്തി(റ)യും തയ്യാറാക്കിയ രണ്ടു ഖസ്വീദകളെ വിശകലനം ചെയ്യുന്ന അമൂല്യ ഗ്രന്ഥമായ ‘അത്തഖസ്സുലുൽ അസ്‌നാ ബിൽ അസ്മാഇൽ ഹുസ്‌ന’ എന്നിവ വിശ്വാസശാസ്ത്രത്തിൽ ഉസ്താദ് നടത്തിയ ഉപകാരപ്രദമായ രചനകളാണ്. ‘അതീദത്തുൽ മഹാം ശർഹുൽ അഖീദത്തിൽ അവാം’ വിശ്വാസശാസ്ത്രത്തിലെ ചെറിയ പദ്യകൃതിയായ സയ്യിദ് അഹമ്മദ് മർസൂഖിയുടെ വിശ്വവിശ്രുതമായ അഖീദത്തുൽ അവാമിന് തയ്യാർ ചെയ്ത അറബി വ്യാഖ്യാന ഗ്രന്ഥമാണ്.
പ്രവാചക ശൃംഖലക്ക് അന്ത്യം കുറിച്ചു കടന്നുവന്ന മുഹമ്മദ് നബി(സ്വ) കാണിച്ച അമാനുഷികതയെ സവിസ്തരം പ്രതിപാദിക്കുന്ന കനപ്പെട്ട ഗ്രന്ഥം ‘അൽ അംസിലാത്തു റാഇഅ മിനൽ മുഅ്ജിസാത്തിസ്സാത്വിഅ’, മനുഷ്യനെ ദൈവിക ശിക്ഷക്ക് പാത്രമാക്കുന്ന മഹാപാങ്ങളെക്കുറിച്ചും വിശ്വാസിയെ ശാശ്വത ശിക്ഷക്കർഹനായ അവിശ്വാസിയാക്കുന്ന മനോവാചാകർമങ്ങളെക്കുറിച്ചും ലളിതമായി സംക്ഷേപിച്ചവതരിപ്പിക്കുന്ന ‘മതപരിത്യാഗം ഭവിഷത്തും കാരണങ്ങളും’, ഇമാം ജലാലുദ്ദീൻ സുയൂത്വി(റ)യുടെ ഖബ്‌റിലെ പ്രശ്‌നോത്തരങ്ങളെ കുറിച്ചുള്ള കാവ്യത്തിന്റെ വരികളിലൂടെ വായനക്കാരെ ഹൃദ്യമായി സഞ്ചരിപ്പിക്കുന്ന ‘സ്വഹാബുസുലാൽ ശറഹു കിതാബിസ്സുആൽ’ എന്നിവ വിശ്വാസശാസ്ത്രത്തിലെ വേറിട്ട ഗ്രന്ഥങ്ങളാണ്.
ജീവചരിത്രം/ ചരിത്രം
‘അബുൽ ബശർ’ മനുഷ്യപിതാവായ ആദം നബി(അ)യെ കുറിച്ചുള്ള സമഗ്രപഠനമാണ്. മനുഷ്യോൽപ്പത്തി, വർഗവൈവിധ്യം, ഭാഷോൽപ്പത്തി, ഭാഷാ വൈവിധ്യം, വർണ വൈവിധ്യം, പരിണാമ സിദ്ധാന്തം, ഭൗതിക പുനർജന്മവാദം ആദിയായ വിഷയങ്ങളെ കുറിച്ചുള്ള ആധികാരിക പഠനം കൂടിയാണിത്.
‘സയ്യിദുൽ ബശർ’ മനുഷ്യവർഗത്തിന്റെ അനിഷേധ്യ നേതാവായ ലോകഗുരു മുഹമ്മദ് മുസ്ത്വഫ(സ്വ)യുടെ സമഗ്രവും എന്നാൽ സംക്ഷിപ്തവുമായ ജീവചരിത്രമാണ്. ജനനം തൊട്ട് വഫാത്ത് വരെയുള്ള സംഭവബഹുലമായ ജീവിതത്തിന്റെ രത്‌നച്ചുരുക്കം കൂടിയാണിത്.
‘ഖലീലുല്ലാഹി ഇബ്‌റാഹീം(അ)’ പ്രവാചക പരമ്പരയിലെ ത്യാഗിവര്യരായ ഇബ്‌റാഹീം(അ)ന്റെ ജീവചരിത്രമാണ്. ‘അൽ ഇമാമുശ്ശാഫിഈ(റ) മനാഖിബുഹു വ മവാഹിബുഹു’ ഹിജ്‌റ രണ്ടാം നൂറ്റാണ്ടിൽ ജീവിച്ച മഹാപണ്ഡിതന്റെ ജീവിതം വിവരിക്കുന്ന ചെറുഗ്രന്ഥമാണ്.
വിശ്രുതമായ സ്വഹീഹുൽ ബുഖാരിയുടെ രചയിതാവ് ഇമാം ബുഖാരി(റ)വിന്റെ ജനനം മുതലുള്ള സുപ്രധാന സംഭവങ്ങൾ വിവരിക്കുന്ന ഗ്രന്ഥമാണ് ‘ഇമാമുൽ മുഹദ്ദിസീൻ മുഹമ്മദ് ബ്‌നു ഇസ്മാഈൽ ബുഖാരി(റ).’ ഔലിയാക്കളുടെ നേതാവ്, പണ്ഡിത ലോകത്തെ സൂര്യതേജസ്സ് എന്നറിയപ്പെടുന്ന ശൈഖ് ജീലാനി(റ)യുടെ ജീവിതത്തെ സംക്ഷിപ്തമായി വിശകലനം ചെയ്യുന്ന ഗ്രന്ഥമാണ് ‘ഖുത്വുബുൽ അഖ്ത്വാബ് അശ്ശൈഖ് അബ്ദുൽ ഖാദിർ ജീലാനി(റ).’
രണ്ടാം ഉമർ എന്ന നാമധേയത്തിൽ പ്രസിദ്ധനായ ഉമറുബ്‌നു അബ്ദുൽ അസീസ്(റ)വിന്റെ വിശിഷ്ട വ്യക്തിത്വത്തെ അനാവൃതമാക്കുന്ന ഗ്രന്ഥമാണ് ‘വാഹത്തുൽ അദ്‌ലി ഫീ ഖാഹത്തിൽ ജൗർ.’ ഐഹിക വിരക്തരുടെ നേതാവായി അറിയപ്പെടുന്ന ഇബ്‌റാഹീമുബ്‌നു അദ്ഹം(റ)വിന്റെ സംഭവബഹുലമായ ചരിത്രവും ജീവിതമാതൃകയും അത്ഭുത സിദ്ധികളും തത്ത്വോപദേശങ്ങളും സംക്ഷിപ്തമായി വിവരിക്കുന്ന ഗ്രന്ഥമാണ് ‘റഈസുസ്സാഹിദീൻ ഇബ്‌റാഹീമുബ്‌നു അദ്ഹം(റ).’
‘തസ്ജീലുശ്ശുറൂഹ് ഫീ തഹ്ശിയ്യത്തി തഅ്ജീലുൽ ഫുതൂഹ്’ ഇരുപതാം നൂറ്റാണ്ടിൽ മധ്യകേരളത്തിൽ വൈജ്ഞാനിക രംഗത്ത് വ്യക്തിമുദ്ര പതിപ്പിച്ച മരക്കാർ കുട്ടി മുസ്‌ലിയാരുടെ തഅ്ജീലുൽ ഫുതൂഹ് എന്ന വിശ്രുത തവസ്സുൽ പ്രാർത്ഥനാ ഗ്രന്ഥത്തിന്റെ വിശകലനമാണ്. ഇസ്‌ലാം കണ്ടെത്തിയ നൂറ് വിശിഷ്ട വ്യക്തികളുടെ ജീവചരിത്രവും അവരെ ഇസ്‌ലാമിന്റെ ശാദ്വല തീരത്തേക്ക് കൊണ്ടുവന്ന ഹൃദയസ്പൃക്കായ സംഭവങ്ങളും ചിത്രീകരിക്കുന്ന ഗ്രന്ഥമാണ് ‘രിഹ്‌ലതുൽ അഅ്‌ലാം ഇലാ റൗളതിൽ ഇസ്‌ലാം.’
പ്രവാചകർക്ക് ശേഷം ലോകം കണ്ട ഏറ്റവും നീതിനിഷ്ഠവും മാതൃകാപരവുമായ നാലു ഖലീഫമാരുടെ മുപ്പതു സംവത്സരം നീണ്ടുനിന്ന സുവർണ ഭരണത്തിന്റെ ലളിത ചരിത്രമാണ് ‘ഖിലാഫത്തുൽ റാശിദ.’ അവർക്കു ശേഷം ലോകത്ത് നിലവിൽവന്ന ഉമവി രാജകുടുംബത്തിന്റെ ഒരു നൂറ്റാണ്ട് കാലത്തെ ഭരണചരിത്രമാണ് ‘ഖിലാഫത്തുൽ ഉമവിയ്യ.’
‘താരീഖുൽ ആലമിൽ ഇസ്‌ലാമി’ കുരിശു യുദ്ധങ്ങൾ, മംഗോളിയരുടെ മുന്നേറ്റം, താർത്താരികളുടെ കടന്നാക്രമണം, മുസ്‌ലിം ഭരണകൂടങ്ങളുടെ ഉയർച്ചയും താഴ്ചയും, ഖിലാഫത്തിന്റെ പര്യവസാന കഥ, ഇന്ത്യയിലെ മുസ്‌ലിം ഭരണകാലം, മുസ്‌ലിം കേരളത്തിന്റെ ശോഭന ചരിത്രം എല്ലാം ഉൾക്കൊള്ളുന്ന മാസ്മരിക സംക്ഷേപമാണ്.
സാഹിത്യം
അറബി സാഹിത്യലോകത്ത് വിശ്രുതമായ ഗദ്യ-പദ്യ സാഹിത്യകാരന്മാരുടെ ഏറ്റവും മികച്ച സാഹിത്യ സൃഷ്ടികളുടെ മാതൃകകൾ, അവയുടെ ആവശ്യ വ്യാഖ്യാനങ്ങൾ പ്രമുഖ സാഹിത്യകാരന്മാരുടെ സാഹിത്യ നിദർശനങ്ങൾ ഉൾകൊള്ളുന്നതാണ് ‘ജിനാനുൽ അദബ്.’
സംഭവകഥ
അനുവാചകരെ കഥകളുടെ വിശാല ലോകത്തേക്ക് നയിക്കുന്ന ബൃഹത്തായ കൃതിയാണ് അൽഫു ഖിസ്സ്വത്തിൻ വ ഖിസ്സ്വ. അത്ഭുത ശരീരങ്ങൾ, അപൂർവ ജഡങ്ങൾ, വിസ്മയം പ്രകടിപ്പിച്ച ശവശരീരങ്ങൾ തുടങ്ങിയ ശീർഷകങ്ങളുള്ള ‘അജ്‌സാദുൽ അജീബ വൽ അബ്ദാറുൽ ഗരീബ’, ദാനധർമങ്ങളെയും സുകൃതങ്ങളെയും വിശദീകരിക്കുന്ന അമൂല്യ ഗ്രന്ഥമായ ‘കിതാബുൽ ജൂദി വസ്സഖാത്തത്ത്, തിരുദർശനവുമായി ബന്ധപ്പെട്ട വിശദ പഠനങ്ങൾ ഉൾക്കൊള്ളുന്ന ‘അൽ ഇംദാദു വൽ ഇർശാദു മിൻ സയ്യിദിൽ അനാം മിൻ ബഅ്ദി വഫാത്തിഹി ഫിൽ യഖ്‌ളതി വൽ മനാം’, മഹത്തുക്കളുടെ അവസാന നിമിഷങ്ങൾ വസ്തുനിഷ്ഠമായി രേഖപ്പെടുത്തുന്ന ‘വഫയാത്തുൽ അബ്‌റാർ’ എന്നിവ വിശ്രുതമാണ്.
ഇതിനെല്ലാം പുറമെ ‘ലി മാദാ, ലി ഹാദാ, കൈഫ ദാലിക, ബുസ്താനുസ്സബ്അ, സഫീനതുസ്സഹ്‌റാഅ്, കളിയും വിനോദവും, യോഗ ധ്യാനം ഇസ്‌ലാം, മാർജാര ശാസ്ത്രം, ഉറക്കവും സ്വപ്നവും, കാത്തിരുന്ന പ്രവാചകൻ, പള്ളികൾ ഭൗതിക പറുദീസകൾ’ തുടങ്ങിയ ഒട്ടനവധി ഗ്രന്ഥങ്ങളും ‘ചിന്താകിരണങ്ങൾ, വിചാര വീചികൾ, നീതിയുടെ നിസ്തുല നിദർശനങ്ങൾ, തൂലികാ തരംഗങ്ങൾ, ദീപ്ത ലിഖിതങ്ങൾ, പഠന സരണി’ തുടങ്ങിയ ബൃഹത്തായ ലേഖന സമാഹരങ്ങളും വായനക്കാരെ വൈജ്ഞാനിക വിരുന്നൂട്ടുന്നവയാണ്. ‘തൻവീറുൽ ഈമാൻ ബി തഫ്‌സീറിൽ ഖുർആൻ, അഖാഇദുൽ ഇസ്‌ലാം, തൻഖീസു താരീഖിൽ ഇസ്‌ലാം, അൽമർഅതു ഫീ ളിലാലിൽ ഇസ്‌ലാം, ബിദായതുന്നഹ്‌വി വസ്സ്വർഫ്’ തുടങ്ങിയ പാഠപുസ്തകങ്ങളും നിലവിലുണ്ട്.
സൈനുദ്ദീൻ ശാമിൽ ഇർഫാനി മാണൂർ